Атырау қаласындағы химия-биология бағытындағы Назарбаев Зияткерлік мектебінде екі ерекше жоба жүзеге аса бастады.
Мектеп шығармашыл ата-аналарды қолдау бағытында «Отбасылық оқырмандар клубы» мен «Таңшолпан» ата-аналар би үйірмесін құрды. Мектеп директорының бастамасымен жүзеге асқан көңіл сергіту сағаттары оқушылардың ғана емес, сондай-ақ, олардың ата-аналары мен отбасы мүшелерінің жаппай кітап оқуға деген қызығушылығын арттыратыны сөзсіз. «Отбасылық оқырмандар клубы» – өз төлбелгісі бар, ата-аналар құрамынан жетекшісі анықталған дербес ұйым. 16 жанұяның ата-анасы ұйымға мүшелікке қабылданды. Олар енді ай сайын зияткерлік мектепке келіп, белгілі әдеби шығармаларды талдап, ақын-жазушылардың өмірі туралы сыр шертетін болады. Кездесу барысында клуб мүшелері өздері оқыған үздік әдеби шығармалар туралы кеңес береді, сахналық қойылымдар арқылы оқушыларға кітаптың құндылығын дәріптейді.
Бұл ұйым – мектеп кітапханасы жанынан ашылған екінші клуб. Осыдан екі жыл бұрын құрылған «Timeless» оқырмандар клубы балалардың арасында кітапқа деген қызығушылығын арттырған еді. Клуб мүшелерінің алғашқы отырысы да болып өтті. Ата-аналар атынан Ибатолла Ерғалиұлы «Timeless» оқырмандар клубының президенті Наргиз Құлшароваға Абайдың қара сөздері жинағын естелікке табыстады.
Сән мен сымбатқа қызығатын, ата-ана мен баланың бір сахнада өнер көрсетуіне жол ашқан тағы бір жарқын жаңалық – «Таңшолпан» ата-аналар би үйірмесінің ашылуы.
Бұл үйірмеде енді ата-аналар аптасына бірнеше рет тегін хореография залына келіп, би үйренетін болады.
Ануар ЖАМАНҚҰЛОВ,
Атырау қаласындағы Назарбаев Зияткерлік мектебінің баспасөз-хатшысы
