Облыс әкімінің орынбасары тағайындалды

WhatsApp Image 2018 11 01 at 11.08.21 e1541053490266 Жаңалықтар

Бүгін өңір активінің жиналысында Атырау облысының әкімі Нұрлан Ноғаев жаңа орынбасарын таныстырды.

WhatsApp-Image-2018-11-01-at-11.08.21-e1541053490266

– Қазақстан Республикасы Президенті әкімшілігінің келісімімен және облыс әкімінің өкімімен Нұрлан Бақтыбайұлы Таубаев облыс әкімінің жаңа орынбасары болып тағайындалды, – деді аймақ басшысы.

Бұған дейін бұл қызметті атқарған Жасұлан Сүйіншалиев осы лауазымнан берген өтінішіне сәйкес өз еркімен босатылды. Ал, әкім орынбасары болып тағайындалған Нұрлан Таубаевтың тұрғын үй-коммуналдық, автомобиль, құрылыс секторына жетекшілік етуге мүмкіндік беретін үлкен жұмыс тәжірибесі бар.

– Мен Жасұлан Асқарұлына осы қызметте атқарған жемісті және белсенді жұмысы үшін алғысымды білдіремін. Сіздің жұмысыңыздың барысында облыста көптеген жобалар жүзеге асырылды. Құрылыс және ТКШ саласы жаңа серпін алды. Сізге алдағы уақытта да жаңа жұмыс саласында өз ісіне адал болуға және өз қызметін кәсіби жүзеге асыруға тілектеспін. Сондай-ақ, мен Нұрлан Бақтыбайұлының тәжірибесі мен білімі қойылған міндеттерді жүзеге асыру үшін пайдалы болатынына сенімдімін. Оның үш жоғары білімі бар. Еңбек қызметінің басында бизнес саласында жұмыс істеді. ҚР Ұлттық экономика министрлігі Табиғи монополияларды реттеу, бәсекелестікті және тұтынушылардың құқықтарын қорғау комитетінің Атырау облысы бойынша департаментінде әртүрлі лауазымдарда қызмет атқарды. 2015 жылы осы департаментті басқарды. 2018 жылдың басынан осы күнге дейін Атырау қаласы әкімінің орынбасары қызметін атқарды. Бұл өңір үшін қажетті жобаларды дамытуға бағытталған міндеттерді іске асыру үшін оның білімі жеткілікті екенін көрсетеді, – деді Нұрлан Асқарұлы.

Нұрлан Таубаев 1976 жылы Атырау қаласында дүниеге келген. Атырау Мұнай және газ институтын, Қазақстан экономика және құқық институтын, Х. Досмұхамедов атындағы Атырау университетін тау – кен инженері, заңгер, экономист-менеджер мамандығы бойынша бітірген. Еңбек жолын 1995 жылы «Экспресс-Юг» ЖШС ди⁠ректорының орынбасары болып бастаған, 1998–2000 жылдары «Денсаулық» ЖШС және «Ислам» ЖШС ди⁠ректоры болып жұмыс істеген. 2000–2006 жылдары Атырау қаласының тұрғын үй-коммуналдық шаруашылық, жолаушылар көлігі және автомобиль жолдары бөлімінің басшысы, 2006–2008 жылдары Бәсекелестікті қорғау комитеті Атырау облысының монополияларды реттеу басқармасының басшысы қызметтерін атқарды.

2008–2012 жылдары ҚР Бәсекелестікті қорғау агенттігінің (монополияға қарсы агенттік) Атырау және Маңғыстау облыстары бойынша өңіраралық инспекциясының бастығы, ал 2012–2014 жылдары Атырау облысы бойынша Монополияға қарсы инспекцияның басшысы болды.
2014–2015 жылдары ҚР Ұлттық экономика министрлігі Табиғи монополияларды реттеу және бәсекелестікті қорғау комитетінің Стратегиялық талдау басқармасының бас сарапшысы болып жұмыс істеді. 2015–2017 жылдары ҚР Ұлттық экономика министрлігі Табиғи монополияларды реттеу және бәсекелестікті қорғау комитетінің Атырау облысы бойынша департаментінің басшысы қызметін атқарды.

Өткен жылдан биылғы 15 ақпанға дейін ҚР Ұлттық экономика министрлігі Табиғи монополияларды реттеу, бәсекелестікті және тұтынушылардың құқықтарын қорғау комитетінің Атырау облысы бойынша департаментінің басшысы болды. Осы жылдың 15 ақпанынан бүгінгі күнге дейін Атырау қаласы әкімінің орынбасары.

Баға берсеңіз
Атырау газеті
Пікір қалдырыңыз