«Қазақстанның киелі жерлері» жобасына Атыраудан тағы 2 кешен ұсынылды

Жаңалықтар Шаһар шырайы

«Қазақстанның киелі жерлерінің географиясы» жобасын жүзеге асыру аясында облыс әкімінің орынбасары Әлібек Нәутиевтің төрағалығымен «дөңгелек үстел» өтті. Оған қатысқан «Қасиетті Қазақстан» ғылыми-зерттеу орталығының басшысы, саясаттанушы, тарихшы Берік Әбдіғалиұлы мен ғылыми кеңесші, тарих ғылымдарының докторы Зейнолла Самашов Атыраудан ұсынылған киелі мекендер тізімі тым аз екендігін сынға алды.

ФОТО - КИЕЛІ ҚАЗАҚСТАН

Олардың айтуларынша, аталған жобаға қойнауы тарих пен тағылымға толы құт мекеннен төрт қана географиялық нысанның енуі аздық етеді. Олар – Сарайшық, Ақмешіт, Ұшқан ата және Махамбет Өтемісұлының кесенесі. Сондықтан, жергілікті ғалымдар мен өлкетанушылар ақылдасып, тағы бірнеше нысанды қосу қажеттігін алға тартты. Расымен де, Атырауда киелі жерлер көп-ақ, тек жан-жақты зерттеуді қажет етеді. Мұны жергілікті тарихшы-этнограф ғалымдардың өздері де мойындайды.

Өз кезегінде, құрамына әр саладан 18 өкіл енген облыстық комиссия мүшелері республикалық тізімді Индердегі «Тұздыкөл» мен «Иманқара-Қойқара» тарихи-тағылымдық, әрі туристік-танымдық кешендерімен толықтыруға ұсыныс жасады. Жиынның келесі бөлігі өңірлік коммуникациялар қызметі орталығында өткен баспасөз конференциясында жалғасты. Мұнда спикерлер журналистердің қойған сауалдарына нақты жауап берді.

Амандық САҒЫНТАЙҰЛЫ

Добавить комментарий

Ваш e-mail не будет опубликован. Обязательные поля помечены *