11-16 наурыз аралығында Қазақстанға коронавирус кіруі мүмкін

13027529 Жаңалықтар

Atr.kz/11 наурыз, 2020 жыл. Жандарбек Бекшин қазіргі жағдайда коронавирус Қазақстанға бір-екі аптаның ішінде кіруі мүмкін екенін атап өтті.

НҰР-СҰЛТАН, 10 наурыз – Sputnik. Бас санитар Жандарбек Бекшин коронавирустың Қазақстанға қашан кіруі мүмкін екенін айтты, деп хабарлайды Sputnik Қазақстан тілшісі.

«Біздің болжамымызға сәйкес, 11-16 наурыз аралығында бізде коронавирус тіркелуі мүмкін. Бірақ бұл болжам ғана, бір апта ары, бір апта бері, коронавирус тіркелген жағдайда бірден арнайы шаралар қолға алынады. Енді ол болжам орындалмасын деп тілейік», – деді Бекшин астанада өткен баспасөз мәслихатында.

Оның айтуынша, денсаулық сақтау министрлігінің жанында арнайы топ бар. Оған кіретін мамандар коронавирустың келу уақытына болжам жасайды. Қазіргі жағдайда осы індет Қазақстанға бір-екі аптаның ішінде кіруі мүмкін.

«Өзіңіз көріп отырсыздар, қазіргі кезде коронавирустың шеңбері қысып жатыр. Бас кезінде Қытай ғана болды. Одан кейін Оңтүстік Корея, Иран, енді Еуропа қосылды. Былай қарасаң, бізді коронавирус жан-жақтан қоршап алды. Басында біз ауруды кіргізбеуге тырыстық. Ендігі мақсатымыз – ол індеттің таралуына жол бермеу. Біз вирустың кірмейтініне кепілдік бере алмаймыз. Себебі вирус жануар емес, оны бір жерге қамап ұстай алмайсың», – деп түйіндеді Бекшин.

Коронавирустың өршуі

Covid-19 деп аталатын жаңа коронавирус 2019 жылдың желтоқсанында тарала бастады. Қытайдың Ухань қаласында (Хубэй провинциясы) бұрын-соңды белгісіз болған ауру өршіді. Қазір коронавирус әлемнің 100-ге жуық елінде анықталды. Джон Хопкинс институтының мәліметінше, әлемде 113 773 адам коронавирус жұқтырған, 4 008 адам көз жұмды. 63 663 адам аурудан айықты.

Қазақстанда әзірге коронавирус тіркелген жоқ. 

Аман ШАМАР

http://atr.kz/bez-rubriki/%d2%b1ltty%d2%9b-bank-bazaly%d2%9b-stavkany-12-pajyz%d2%93a-dejin-k%d3%a9terdi/
Баға берсеңіз
Атырау газеті
Пікір қалдырыңыз