Балаңыздың болашағына алаңдайсыз ба?

Былтыр Бесікті ауылында орын алған сұмдық оқиға бала тәрбиесіне деген салғырт көзқарас бар екендігін байқатты. Өткен жылдың өзінде аймақта жасөспірімдерге қатысты 48 қылмыс жасалған. Әлі де оңы мен солын танып үлгермеген жас ұрпақ тамырына балта шабу деректері неге көбейді? Жантүршігерлік жағдайларды қайтсек азайтамыз? Осынау маңызды мәселелер кәмелетке толмағандардың істері және олардың құқықтарын қорғау жөніндегі облыстық комиссия отырысында қозғалды.

Баланын болашагы

Облыстық ішкі істер департаментінің жергілікті полиция қызметі ювеналды полиция тобының аға инспекторы Орынгүл Жанғалиеваның айтуынша, кәмелетке толмағандарға қатысты жыныстық сипаттағы 19 іс тіркелген. Оның төртеуі зорлау, 16 жасқа толмаған баламен жыныстық қатынас жасау, бесеуі кәмелетке толмағандарды азғындау фактілері болып отыр. Қылмыстарды талдау кезінде олардың туысқандарының қылмысқа жол беріп, ата-аналардың өтпелі кезеңдегі жасөспірімдеріне салғырттықпен қарау салдарынан орын алғанын анықтаған.

Сондай-ақ, балалардың өз бетінше үйлерінен кетіп қалу деректерінің тіркелуі азаяр емес. Өткен жылы кәмелет жасына жетпеген 48 бала отбасынан қашып кеткен. Тәртіп сақшылары мұның негізгі себебі жасөспірімдердің моральдық және психологиялық тұрақсыздығы екендігін айтады. Есесіне, бұл қадамға барған баланың өзі қылмыс нысанына айналатынын түсіне бермейді.

Комиссия отырысында ерте жастан жүктілікті болдырмау, қыздар тәрбиесі де талқыланды.

«Денсаулық сақтау басқармасының мәліметіне сәйкес, ерте жастан жүкті болу деректері азайып келеді. Мәселен, осыдан үш жыл бұрын 15-16 жастағы 73 қыз баланың 27-сі – оқушы, 46-сы колледж студенті болса, былтыр 50 қыздың тоғызы – мектеп шәкірті, 41-і орта және арнаулы оқу орнының жастары. Оқушы кезінде жүкті болғандардың дені — Атырау қаласынан»,-деген облыстық білім беру басқармасының басшысы Қайырғали Кенжеғалиев бұл жағдайлардың алдын алу бағытында атқарылып жатқан жұмыстарға тоқталды.

Облыс әкімінің орынбасары Нұрсәуле Сайлауова мектептегі тәрбиелік жұмыстармен қатар, ата-ананың да жауапкершілігін күшейту керектігін атап айтты.

«Ерте жастан жүктілікті болдырмау жолында ата-аналардың да жауапкершілігін күшейту қажет. Тіпті, керек болса, мұндай қадамға барған баланың әке-шешесін заңды түрде шартты жазалау немесе көп мөлшерде айыппұл салуға дейінгі шара қолдану керек. Сол кезде бала да ойланар»,-дей келе, Нұрсәуле Сайлауқызы бұл бағыттағы жұмыстарды әлі де жандандыру қажеттігін жеткізді.

Айбөпе САБЫРОВА

Оставить комментарий

Ваш email нигде не будет показанОбязательные для заполнения поля помечены *

*