Атырауда пайдаланылмаған жер телімдері тәркіленді

Махамбет ауданындағы көшпелі отырыста жерді беру және пайдалану мәселелері талқыланды,-деп хабарлайды Атырау облыстық Өңірлік коммуникациялар қызметі.

0def125f-8026-40d1-991b-17cd30c91789

Атырау облыстық жердің пайдаланылуы мен қорғалуын бақылау басқармасының басшысы Гүлзия Құрманованың мәлімдеуінше, 2017 жылы инспекторлар 534 жоспардан тыс тексеру жұмыстарын жүргізген. Нәтижесінде 448 құқық бұзушылық анықталған. Заңды белшеден басқан жер иелеріне 61 млн.теңге көлемінде айыппұл салынды.

«Қазіргі таңда пайдаланылмаған жер телімдерін тәркілеу жұмыстары жүргізілуде. Ең басты мәселе, жеке тұлғалар ауыл шаруашылық жұмыстарына жер сатып алады, кейіннен оларды жеке тұрғын үй құрылысы үшін қайта сатады. Осындай жағдай Береке ауылында орын алды. Адамдар үй салды, ал біз ол жерлердің заңсыз екенін айтуымыз керек. Кезінде біреулер құрылыс жұмыстарына рұқсат берген, бірақ тексеру жұмыстарының нәтижесі бойынша заңсыз деп танылып отыр»,-деді Махамбет ауданының әкімі Сырым Рысқалиев.

80f6bb54-ee7b-44b4-9b52-b0e79ea79567

Атырау облысының әкімі Нұрлан Ноғаев өз кезегінде аталған тақырыпта ауыл тұрғындарымен жиі кездесу керектігін атап өтті.

«Ауыл шаруашылығына арналған жер телімдері осы бағытқа бөлінген. Біз барлық жерді алу міндетін қоймаймыз, бірақ бұл учаскелерде үй салуға болмайды. Осындай фактілерді ашып, қажет болған жағдайда, заң бойынша мұндай құрылымдарды бұзу туралы аудан әкіміне міндет жүктедім. Бұрынғы қалпына кері қайтаруды тапсырдым. Тек осы жағдайда ғана заңсыз құрылыс жүргізетін адамдар ойланып, жерді заңсыз алу жолдарын тоқтатады. Біз ауыл шаруашылығымен айналысқысы келетін адамдарға жер телімдерін тауып беруге тырысамыз, десек те жүздеген гектар жер не мақсатына сай пайдаланылмайды, не кері сатылуда. Сонымен қатар, аудан әкімдері осындай жағдайдағы жер иелерімен кездесіп, олардың мәселесін шешу туралы ұсыныс жасау керек. Халықтың кінәсі мына жерлерді сатып алғаны»,-дейді аймақ басшысы Нұрлан Ноғаев.

Осы орайда, Жылыой ауданында рұқсатсыз жер телімдерінде заңсыз салынған үш кәсіпкерлік нысан анықталған. Ал, жергілікті әкімдік ғимараттарды бұзу туралы шешім қабылдады.

e56d9962-b25b-4607-bd71-2f72c65d9321

Айта кетейік, 2017 жылдан бастап жердің пайдаланылуы мен қорғалуын бақылау басқармасы жер телімдерін анықтау үшін аэроғарыштық суреттерді пайдалана бастады. Былтыр 9 мыңға жуық заңсыз жер телімдері анықталған. Бұл жұмыс биыл да жалғасын таппақ. Арнайы топтар құрылған, енді олар аэрофототүсірілім деректерін пайдалана отырып, жер учаскелерін тексереді және жер телімдерін дұрыс пайдалануды реттейтін болады.

Жиын соңында облыс әкімі жауапты тұлғаларға бірқатар нақты тапсырмалар берді.

Айқара Ғұмар

Оставить комментарий

Ваш email нигде не будет показанОбязательные для заполнения поля помечены *

*